( میدیایەکی بابەتیی و ئەهلیی سەربەخۆیە)

بایەخ بە هه‌واڵ و راپۆرت و شیکاریی و بە دواداچوون و وەرگێران دەدات لە مەلەفەکانی: کوردستانیی، عێراقیی، ناوچەیی، نێودەوڵەتیی.


ناوەرۆکی پرۆژە:

پرۆژەکە میدیایەکی بێلایەن و ئازادە، هەوڵ دەدات لە ئاستێکی باڵای زانستیی نوسین و هونەریی رۆژنامەوانیدا کار لەسەر مەلەف و دۆسیە تایبەتەکان بكات، بە زمانێکی پیشەیی میدیایی بابەتەکانی دەخاتەڕوو، هەوڵ دەدات زۆرترین زانیاریی دروست بخاتەڕوو بۆ ئەوەی یارمەتی خوێنەر بدات بۆ بیرکردنەوە و تێگەیشتن لە پشتەوەی رووداوەکان و دۆسیە گرنگەکان.

بوارەکانی کارکردن:

ـ سیاسیی:
رووداوە سیاسییەکانی هەرێمی کوردستان و عێراق و ناوچەکە و ئاستی نێودەوڵەتیش لە خۆ دەگرێت، بە شێوەی راپۆرت و بەدواداچوون و وتاری شیکاریی دەیانخاتەروو.

ـ  ئابوریی:
دۆسیە گرنگەکانی ئابوریی و کار و بازار و دراو و ململانێ ئابورییەکانی ناوخۆیی و دەرەکی لە خۆدەگرێت، لەگەڵ بایەخدانی تایبەت بە کەرتی نەوت و وزە و کاریگەرییان لەسەر ململانێی ناوخۆیی و سیاسییەکان.

ـ سەربازیی:
بە پێچەوانەی میدیای کوردییەوە کە ئەم بوارەی پشتگوێخستووە، ئەم پرۆژەیە بایەخی تەواو دەدات بە بوارەکانی پەیوەست بە ململانێ سەربازییەکان و خۆ پرچەک کردن و هەواڵگریی و روبەروبوونەوەی تیرۆر و هەموو بەشەکانی تری پەیوەست بە سێکتەری سەربازییەوە.

ـ فەرهەنگ:
بوارەکانی پەیوەست بە ئاریشە کۆمەڵایەتییەکان و دیاردە کلتورییەکان و پێکەوە ژیان و لێبوردەیی و پەیوەندی نێوان تاک و گروپە کۆمەڵایەتییەکان دەگرێتەوە کە کاریگەرییان لەسەر رەوشی گەشەسەندنی کۆمەڵگە و ئاڵوگۆریی کۆمەڵایەتی نێوان کلتور و زمانە جیاوازەکان دەبێت.

ـ ئاینناسیی:
بە شێوەیەکی بابەتیی و زانستیی بایەخ دەدات بە بوارە جیاوازەکانی ئایین و شیکردنەوەی مێژوویی و ئەکادیمیی پەیوەست بە ئایین و کاریگەریی و رەنگدانەوەی لەسەر مرۆڤایەتی دەخاتەروو، هەوڵ دەدات بۆ قوڵکردنەوەی رۆحی پێکەوە ژیان لە لای شوێنکەوتووانی ئاینە جیاوازەکان لە کوردستانی  عێراقدا.

ـ وەرگێران:
بەشێکی هەرە گرنگی ماڵپەرەکەیە و رۆژانە ستافی ماڵپەر چاودێری میدیای بیانی دەکەن و بابەت و نوسینە گرنگەکان، بە تایبەت ئەوانەی راستەوخۆ و ناراستەوخۆ پەیوەندییان بە کوردەوە هەیە وەردەگێردرێنە سەر زمانی کوردیی و بڵاویان دەکاتەوە.

ـ توێژینەوە:
 بۆ ئەو بابەتانەی پێویستیان بە لەسەر وەستانی زیاتر و قوڵبوونەوەی زیاتر هەیە بۆ تێگەیشتن و شیکردنەوەی رەهەندە جیاوازەکانی یان دەرخستنی بە شێوەی ژمارە و ئاماری دروست، ماڵپەرەکە توێژینەوەیان لەسەر دەکات، بۆ ئەمەش پەیوەندی و هەماهەنگی تەواو دروست دەکات لەگەڵ توێژەرەکان و مامۆستایانی زانکۆ.

ـ ئینفۆگرافیک:
کورتکردنەوە و پوختکردنەوەی راپۆرت و مەلەفە تایبەتەکان و خستەروویان بە شێوەیەکی ڤیدیۆیی یان وێنەیی، ماڵپەرەکە ئەم سێکتەرە بە هەند وەردەگرێت و رۆژانە لە رێگەی پەیجەکانییەوە ئینفۆگرافیکە پێویستەکان بڵاودەکاتەوە.

مەلەفە تایبەتەکان:

جگە لە رووماڵکردن و بەدواداچوونی بابەتە گەرمەکانی رۆژنامەوانی و رووماڵکردنیان بە شێوەیەکی رۆژانە، پرۆژەکە کیڵگەی بایەخپێدانەکانی فراوانتر دەکات و  بە ووردیی کار لەسەر ئەم دۆسیانە دەکات:

1. مێژووی نوێء هاوچەرخی کورد (لێکدانەوەی هۆکارء دەرئەنجامی رووداوە نوێء هاوچەرخەکانی کورد لەهەر چوار پارچەی کوردستان ).

2. پەیماننامەء رێکەوتننامە ناوچەیی و نێودەوڵەتییء کاریگەرییء دەرئەنجامەکانیان لەسەر کێشەی کورد.

3. کێشەی کورد لە باکور و خۆرهەڵاتی کوردستان لەروانگەی شیکردنەوەی لەپەیوەندییە ناوچەیی و نێودەوڵەتییەکاندا.

4. رۆژئاوای کوردستانء ئەزموونی فیدراڵی رۆژئاوا لەچوارچێوەی سیاسەتی نوێی ئەمەریکاء هاوپەیمانێتی نێودەوڵەتی جەنگ دژی داعشء ئایندەی ئەزموونی رۆژئاوای کوردستان.

5. پارتء رێکخراوە سیاسییە کوردییەکانی هەر چوار پارچەی کوردستان لەرووی (پێکهاتەی سیاسیی، بەرنامەی سیاسیی، تاکتیکء ستراتیژیەتی کارکردنی سیاسیی، ئامانجء تێڕوانینی سیاسیی ئایندەیی).

6. بایەخدان بەچەمکە سیاسییەکانی وەک (مافی چارەی خۆنووسین، ریفراندۆم، فیدراڵی، ئاشتیی، مافی مرۆیء پێکەوەژیان، لێبوردەیی سیاسیی)، وەک پرۆژەی کارکردن  بۆ ئایندەی هەر چوار پارچەی کوردستان.

7. کێشەی کورد لەپەیوەندییە نێودەوڵەتییەکانی: (ئەمەریکا، بەریتانیا، فەرەنسا، روسیا، یەکێتی ئەوروپا).

8. کێشەی کورد لەهەر چوار پارچەی کوردستان لەپەیوەندییە هەرێمییەکانی (ئێران، عێراق، سوریا، تورکیا).

9. دۆسیەی ئیسلامی سیاسییء تەوژمی سۆفیگەرییء سەلەفیزم لەروانگەی شیکردنەوەی گوتارء بەرنامەء ستراتیژی کارکردنء کاریگەرییء رەنگدانەوەیان لەسەر کێشەی کوردء کۆمەڵگەی کوردیی.

10. ئەزمونی سیاسییء تێڕوانینی سیاسیی سەرکردەء سیاسەتمەدارانی کورد لەهەر چوار پارچەی کوردستانء شیکردنەوەی تێزە سیاسییەکانیانء بەرهەمهێنانی تێڕوانینی سیاسیی نوێی ئایندەیی لەپێناوی کارکردنی سیاسیی نوێ لەکوردستاندا.

11. بایەخدان بەتوێژینەوەء لێکۆڵینەوەی بیانی تایبەتمەندء ئەکادیمی بەکێشەی کوردەوەء وەرگێڕانیان بۆ سەر زمانی  کوردی.

هەروەک ئەم پرۆژەیە دەتوانێ ببێتە مەرجەعێکی زانستیی بۆ حکومەت و حزبە سیاسییء ناوەندە رووناکبیرییەکان، دواتریش دروستکردنی کاریگەریی لەنێو دامەزراوە ئەکادیمیەکانی وەک زانکۆء پەیمانگەکان، تاوەکو مەعریفەء بەرچاو رۆشنیان بداتێ لەهەموو ئەو بوارانەی دەستنیشانکراون بۆ کارکردن تیایاندا.


دانا ساڵح مەلا محەمەد
سەرنوسەر و خاوەن ئیمتیاز ـ   ماستەر لە پەیوەندییە گشتییە سیاسییەکان.