عهبدولڕهزاق شهریف
حیزب بە هەمو پێناسە و مانا جیاجیاکانی، بە فرە تێز و فکر و ئاراستە چەپ و راستەکانیەوە، لە دنیای ئەمڕۆی حوکمڕانیدا، لە سەرتاسەری جیهاندا لە پاشەکشەدایە، لەو وڵاتانەشدا کە حیزب و بنەماڵەی حاکم هەن هەم لەوانەی یاسا تیایاندا بەرقەرار نییە، زیاتر لەوەش وەک گروپی بەرژەوەندیخواز و دژە بەرژەوەندی کۆمەڵگە پێشکەوتن و نیشتیمان دەردەکەون و خۆیان نمایش دەکەن.
لە عێراق و هەرێمی کوردستاندا، ئەم گروپ و گەلە حیزبانە، ناشرینترین جۆری کۆڕ و کۆمەڵیان دروستکردوە و بە ئاشکرا نمایشی بەژەوەندیی تایەفە و دین و عەشیرەت و بنەماڵە دەکەن.
حوکمدارێتیان بە زەبری چەک و چۆڵ و تاڵانی و دزی مومتەلەکاتی دەوڵەت بەدەستهێنا و قۆرغکرد ( لە سەروەختی روخاندنی رژێمی پیشودا و نافرسەتی لە غیابی دادگا و یاسادا ) و تا ئێستا وەک ئیرسی شۆڕشگیری پیادەی دەکەن.
هەر ئەم تاڵانیە بووە بە بنەمای جیگیر بوون و هێزی کۆکردنەوەی ئەو خەڵکانەی کە لە خۆیان دەچن و بەردەوام بونیان، بە پێچەوانەشەوە دوورکەوتنەوەی هەموو ئەوانەی کە بەو دزی و تاڵان و بڕۆیە ڕازی نین.
لە ژێر دەسەڵاتی ئەم تەرحە گروپانەدا ژیانی خەڵک و ئیدارە و پەرلەمان و تەنانەت هەڵبژارنیش هیچ ئەرزش و بەهایەکی نییە، دواجار بەرژەوەندییەکانیان یەکیان دەخات و بە جۆریکی تر دێنەوە مەیدان.
پرسیاری ژنێکی شاری سلێمانی لە بەردەم مایکی کامێراکاندا، مایەی ڕامان و بیرکردنەوەیە، ئەو دەڵێ ( نازانین چۆن ڕزگارمان بێت لە دەست ئەم حیزبانە ؟ ).
وەڵامی ئەم پرسیارە ئەرک و پێویستی هەموو ئەو کەسانەیە کە خۆیان بە خەمخۆر و دڵسۆزی هەرێمی کوردستان و خەڵکەکەی دەزانن لەم قۆناغەدا، بەرپرسیارێتیەکی ئەخلاقیشە لەسەر کۆمەڵی کوردەواریی.
نزیکەی سەدەیەکە، کورد لە عێراقدا بە دوای ژیانێکی ئاسودەوەیە، لەو پێناوەدا، دەیان رێگەی خەبات و جوڵانەوەی سیاسی گرتوەتەبەر، ڕوبەڕوی شەڕی گەورە و جینۆساید و ماڵوێرانی گەورە بوەتەوە، لە هەموویدا، لە ناوخۆی عێراق و دەرەوەشدا، بێ پشتیوانی یاسا و دەستور بووین، وەک یاخی و گێرەشێوێن پێناسەمان کراوە، دوای روخان و نەمانی حوکمی بەعسی عێراقی دەرویەکی خێرمان لێکرایەوە، دەستورێکی تەوافوقی نوسرا و دەنگمان پێدا، ئەم تەرحە حیزبانەی کوردستان نەیانتوانی لای کەمی مافی بە شکۆوە ژیان و ئارامی بۆ کورد دەستەبەر بکەن، بە پێچەوانەوە، سەرەنجام خۆزگە بە ساڵانی ئاگر و ئاسنی رژێمە حوکمدارەکانی عێراقی پێشوو دەخوازین، چونکە بە کەرامەتەوە شەڕمان دەکرد و دەسوتاین.
ئێستا چۆن وەڵامی ئەو پرسیارە بدەینەوە و چی بکەین ؟
دوور لە یاخیبونی یاسایی و دەستوریی، رێگەیەکمان هەیە ( بۆ رزگاربوونی ئەوەندەی هەیە لەم قۆناغەدا، رزگاری بکەین )، لە سەرکەوتندا، بۆ ئایندەی کورد بناغەیەکی پتەو دائەنێین.
بە پشتبەستن بە مادەی (119) ی دەستوری عێراق، بە پابەند بوون بە دەستور و یاسا بەرکارەکانی دەوڵەتەوە دەتوانین خەباتی میللەتەکەمان بخەینە سەر ڕێگەیەکی نوێ، بێ ترس و بێسڕینەوەی کەس، پێکەوە کار و تێکۆشان بۆ سەربەخۆیی هەرێمی سلێمانی بکەین.
کە لە هەرێمی کوردستاندا، مافی داواکاری بە کەرامەت ژیانمان نەبێت، با لە دەڤەرێکدا، بتوانین داوای مافی چارەنووسی خۆمان بکەین.
بە سەرکەوتن و پێشکەشکردنی نمونەیەکی جوانی حوکمدارێتی، گەلی کوردستان، شارەکانی تری هەرێم بە پەرۆشەوە هەمان ڕێگە دەگرنە بەر.
دەستورێک بۆ هەرێمی سلێمانی، بەدەست و فکر و دەنگی خەڵکەکەی، دەکرێ سلێمانی بکات بە نوایەکی ئارام و بناغەیەکی پتەوی کۆشکی سەربەخۆیی، بۆ ئایندەی کوردستان.
لە ڕووی جیۆپۆلەتیک و ژێرخان و سەرخانی ئابوریشەوە ناوچهی سلێمانی هەموو مقەوەماتێکی ئەو ئامانج و ستراتیژەی تێدایە، وەک دەڵێن ڕێگە دوور بێت یا نزیک بە هەنگاوێک دەست پێدەکات.