کۆنفرانسی حەسەکە کە چەندی لایەنی کۆک و ناکۆکی کۆکردەوە، ئامانجەکەش تەنها داهاتوی چۆنیەتی بەڕێوەبردنی سوریا بو.
کۆنفرانسێکی گرنگ و ترسناک بو چونکە ڕێک پاش سەردانەکەی وەزیری دەرەوەی تورکیا (هاکان فیدان) بو بۆ دیمەشق کە پێشینەی سەردانەکەش ئاشکرا نەکرابو، سەردانەکەش زۆر تایبەت و جیاواز بو بەتایبەتی لە کۆبونەوەی لەگەڵ احمد الشرع کە ئامانج لێی ئاگادار کردنەوەیەکی ڕون و ئاشکرای گەیاند بە احمد الشرع.
ئەوەی گرنگە، کام لایەن ئەو کۆنفرانسەی ڕێکخست؟ ئاشکرایە کە هێزەکانی سوریای دیموکرات (هەسەدە-قسد) ئەو کۆنفرانسەی ڕێکخست، پاشان ئایا دەکرێ بەبێ ئەمەریکا ئەو کارە بکرێ؟
لە ماوەی ڕابردو چەند جارێک مەزلوم عەبدی لەگەڵ نێردەی ئەمەریکا بۆ سوریا (تۆماس باراک) یەکتریان بینی و پەیوەندیەکان بەردەوامی هەیە لەگەڵ چەند بەرپرسێکی ئەمەریکی دیکەش.
ئەوەی تێبینی دەکرێ لەپاش لێدوانە نەرێنیەکەی تۆماس باراک لەبارەی داهاتوی سوریا و ڕەتکردنەوەی سیستەمی فیدراڵی، ئێستا تیبینی دەکرێ لێدوانەکان گۆڕانکاری ئەرێنی بەسەرهاتوە، بەتایبەتی پاش ئەو هێرشەی بۆ سەرسوەیدا لە کوشتن و بڕین و ئەتک کردنی دروزەکان، پاشەکشێ و گۆڕانکاری لە لێدوانی تۆماس باراک بەدی دەکرێ بەوەی کە پێویستە سوریەکان خۆیان بڕیار لە بەڕێوەبردن و چارەنوسی خۆیان بدەن، ئەوە تورکیای نیگەران کردوە بەڵام تورکیا هیچی پێناکرێ تەنها فشارکردنە لە احمد الشرع.
ئەگەر تێنینی بکەی لە سەرەتای ئەو هەفتەیە وەزارەتی بەرگری تورکیا بەیانێکی دەرکرد بە دوبارە ناوهێنانی هێزەکانی سوریای دیموکرات (هەسەدە-قسد) تۆمەتباریان دەکا کە پابەندنین بە جێبەجێ کردنی ئەو لێکتێگەێشتنە کە لەگەڵ احمد الشرع مۆریان کردیە، یەکەم جارە لەپاش نزیکەی ٣ مانگ بەیانێکی فەرمی لە تورکیا دەربچێ و دوبارە (هەسەدە-قسد) بە تیرۆریست ناوزەند بکاتەوە!! لەبەرئەوەی لێکدانەوەی تورکیا بۆ (هەسەدە-قسد) کۆنفرانسێکی ڕێکخست بۆ کۆکردنەوەی لایەنە ناکۆکەکانی سوریا دژی دیمەشق بە پاڵپشتی ئەمەریکا.
تورکیا پاش کۆنفرانسی حەسەکە هەست بە ترس دەکا لەسەر بەرژەوەندیەکانی لە سوریا بەتایبەتی کە دەبینی ئەمەریکا و فەرەنسا زۆر بە زەقی پشتیوانی ڕۆژئاڤا دەکەن
تورکیا ترسی لە دابەشبونی سوریا هەیە ئەگەر دیمەشق بەردەوام بی لەسەر ئەو ئاڕاستەیەی کە ئێستا لەسەری دەڕوا و پێشبیبی دەکا کە ئێران دوبارە بگەڕێتەوە سوریا و پاڵپشتی و پشتگیری لایەنێکی دیاری کراو بکا بە هەمان شیوە لەوانەیە ڕوسیا بەهۆی هاڵەکانی احمد الشرع لە بەڕێوەبردنی سوریا هەژمونی خۆی بسەپێنی (تورکیا هەرگیز ئەوانەی ناوێ).
پرسیارەکە لێرە ئەوەیە ئەگەر ڕوسیا بگەڕێتەوە سوریا ئایا لە دەروازەی دیمەشق یان لە دەروازەی حەسکە دەگەڕێتەوە؟؟ دیمەشق پێویستە یەکیان هەڵبژێرێ. پەیمانی سوریا بۆ وەبەرهێنان لە وڵاتەکەی زۆرینەی درۆ دەرچو بەوەی چەندین ڕاپۆرتە هەواڵ هەیە لەسەر گەندەڵی و دزی و جەردەیی کە سوریا ئەو ژینگەیە نیە وڵاتان وەبەرهینانی تیدا بکەن، چونکە گوێ لە ئامۆژگاری و ڕاوێژی ئەمەریکا و ئەوروپا و هەتا تورکیاش نەگیرا.
هەر بۆ زانیاری بەرچاوڕونی لە ئێستا ئەمەریکا تاوتوێی درێژکردنەوەی سزای قەیسەر دەکاتەوە لەسەر سوریا لە ڕێگای لیژنەی دارایی کۆنگرس کە بڕیارە لە مانگی ٩ تاوتوێ بکرێ لەجیاتی هەڵگرتنی سزای قەیسەر بیر لە درێژکردنەوەی سزاکان دەکرێ، ئەوانە هەمو نامەی ئاگادارکردنەوە بو بۆ دیمەشق بەڵام گوێی نەگرت، بەو ڕەفتارەی کە ئیستا سوریا بەڕێوەدەبردرێ بەرژەوەندی تورکیا و سعودیە و ولاتانی دیکە دەکەویتە مەترسی ئەگەر دیمەشق لەسەر ئەو ئاڕاستەیە کە ئێستا لەسەری دەڕوا پاڵپشتی و هاوکاریەکان دابەش دەبی بەو مەرجەی ئەگەر احمد الشرع دوایین نامە و ئامۆژگاری و ڕاوێژی هاکان فیدان لە گوێ نەگری و دەست بە چاکسازی خێرا و ڕیشەیی نەکا.
وەڵامی سوریا بۆ کۆنفرانسی حەسەکە هاندەرێکە بۆ دابەشبونی سوریا، لەپاڵ وەڵامی سوریا وڵاتانی عەرەبیش نیگەرانن لە چۆنیەتی بەڕێوەبردنی سوریا و تێبینی زۆر هەیە لەوەی کە لە سوریا دەگوزەرێ بەتایبەتی ئەوەی بەسەر دروزەکان و عەلەوەیەکان هات، لەولاش تورکیا پاش کۆنفرانسی حەسەکە هەست بە نیگەرانی و ترس دەکا لەسەر بەرژەوەندیەکانی خۆی لە سوریا بەتایبەتی کە دەبینی ئەمەریکا و فەرەنسا زۆر بە زەقی پاڵپشت وپشتیوانی ڕۆژئاڤا دەکەن.
ئەمەریکا بەردەوامە لە پاڵپشتی سەربازی بۆ هیزەکانی سوریای دیموکرات (هەسەدە-قسد) لە دژی دیمەشق، تورکیا چاک دەزانێ کە ئەوەی (هەسەدە-قسد) بەهێز دەکا و بیانو دەدا بە ئەمەریکا و لایانەکانی دیکە دیمەشقە، هەر لەبەر ئەوەیە فشار دەکەن لە دیمەشق کە بیانو نەدا بە ئەمەریکا بۆ پشتگیری و بەهێزکردنی (هەسەدە-قسد).
فشاری تورکیا لەسەر دیمەشق لەبارەی پچڕاندنی پەیوەندیەکانی و هەڵپەساردنی کۆبونەوەی پاریس کە بڕیار بو ئەنجام بدرێ لە نێوان دیمەشق و (هەسەدە-قسد)، بەڵام ئاخۆ ئەو هەنگاوە لە قازانجی کێیە؟
بە مسۆگەری لە قازانجی دابەشبونی سوریایە، نەک یەکپارچەیی خاکی سوریا کە دیمەشق
بانگێشەی بۆ دەکا (ڕێک پێچەوانەکەی ڕاستە).. هەروەها دیمەشق پێویستە بەرژەوەندیەکانی خۆی لەگەڵ بەڕژەوەندیەکانی تورکیا تێکەڵ نەکا، چونکە دیمەشق پێویستە ئەو ڕاستیە بزانێ کە لەوانەیە تورکیا ئامادەبێ بۆ پیکهاتن لەگەڵ (هەسەدە-قسد) لە ڕیگای دانوستاندن لەگەڵ عبداللە ئۆجەلان و پارتی کرێکارانی کوردستان (پەکەکە) کە ئەوە زۆر لەگینە! چونکە ترشی و بێ تاڵی بێ (هەسەدە-قسد) بەڵێکی گرنگی دانەبڕاوی بیری عبداللە ئوجەڵانە و فەلسەفەی بەڕێوەبردنی ڕۆژئاڤا لەو بیرە چەپگەراییە و نیمچە دیموکراتیە هەڵقوڵاوە بە ئەرێنی و نەرێنی.
لە دوایین سەردانی هاکان فیدان بۆ میسر تەورێکی گرنگی گفتوگاکانی نێوانیان ئەوە بو کە پێویستە ڕۆڵی وڵاتانی عەرەبی زیاتر بکرێ، نەک تەنها وڵاتانی کەنداو بۆ دوبارە بنیاتنانەوەی سوریا، بەڵام میسر خاوەن بۆچونی خۆیەتی لەبارەی ئەو دارودەستە ئیخوانیەی کە سوریا بەڕیوە دەبەن و ترسێکی زۆری هەیە لە ئیخوانەکانی ناوخۆی میسر، بەهەمان شێوە دارودەستەی بەڕێوەبردنی ئوردن ترسیان لە فەلەستینیەکان هەیە کە بەشێکن لە ڕێچکەی بیری ئیخوانی.
