هەبوون و مانەوەی هەرێمی کوردستان و ڕۆژئاڤا بە تەواوی پەيوەست بووە و پەيوەستە بە هاوکێشە نێودەوڵەتی و هەرێمايەتييەکان. ململانێی نێوان ئەمريکا و عيراق بووە هۆکاری درووستبوونی هەرێمی کوردستان. ململانێی ئەمريکا لەگەڵ ڕووسيا و ئەسەد لە سووريا بووە هۆکاری درووستبوونی ڕۆژئاڤا.
هاوکێشە ئيقليميەکەش هەندێک کات لە سوودی مانەوەی ئەو دوو قەوارەیە بووە. بۆ نموونە پشتگيری ئيماڕات و سعوودييە لە ڕۆژئاڤا وەک دژایەتی کردنی ئەسەد و تورکيا، درووستکردنی پەيوەندی لە نێوان هەرێم و ئيماڕات و سعوودييە، ديسانەوە هۆکارێکی بريتييە بووە لە ململانێی نێوان ئەو دوو دەوڵەتە لەگەڵ ئێران و عيراق کە سەر بە بەرەی ئێرانە.
کاتێک دوو دەوڵەتی گرنگی ناوچەکە وەک سعوودييە و ئيماڕات قازانجيان لە پشتگيریکردنی کوردە، ئەوا پشتگيری نێودەوڵەتيش کە ئەمريکایە، ئاسانتر و باشتر دەبێت.
سعوودييە و ئيماڕات دوو دەوڵەتی گرنگی ڕۆژهەڵاتی ناوەڕاستن بە تايبەت لە دوای سەرهەڵدانی بەهاری عەرەبييەوە، ئەو بەرەیە چەندين یاری گرنگيان لە ئێران و تورکيا بردەوە. لە هەندێک ڕووەوە، دەکرێت بە سەرکەوتووترين دوو دەوڵەتی ناوچەکە دابنرێن، بەوەی خۆشگوزەرانی و سەقامگيری ناوخۆیان لە دۆخێکی زۆر باشە، هەژموونيان لە ناوچەکەش، لە هەندێک کات، سەرکەوتوو بووە بەسەر هەژموونی ئێران و تورکيا.
دوای سەرکەوتنی ئەم بەرەیە لە بەهاری عەرەبی، دەيەوێت دۆخی ناوچەکە بەرەو سەقامگيری و ئارامی ببات. هەر بۆیە هەردوو دەوڵەت لەگەڵ ئەسەد پەيوەندييان درووستکردەوە، لەگەڵ تورکيا و ئێرانيش پەيوەندييەکەیان بەرەو باشتر و سەقامگيرتر دەبەن، هاوکات دەيانەوێت عيراقيش بگەڕێننەوە بۆ جيهانی عەرەبی.
کەواتە ئەو پشتگيرييەیی ئەو بەرەیە بۆ کورد، کە بەرەیەکی سەرەکیيە لە ناوچەکەدا و رکابەری هەژموونی ئێران و تورکيایە، بەرەو کەمی دەچێت. چونکە دەيانەوێت پەيوەندييەکی نوێ و ئارامتر لەگەڵ هەر یەک لە تورکيا و ئێران و سووريا و عيراق درووست بکەنەوە.
درووستکردنی پەيوەندييەکی باش لەگەڵ ئەو چوار دەوڵەتە، واتە کەمکردنەوەی پشتگيريان بۆ کورد. ئەمە زیانی گەورەی دەبێت بۆ هەرێمی کوردستان و ڕۆژئاڤاش.
لە بەرامبەردا گرنگترين هێز کە ئەمريکایە، هاوکێشەی نێودەوڵەتييەکە، چەند ساڵێکە تا ڕادەیەکی زۆر بێ زار بووە لە هەرێمی کوردستان، هەندێک دەنگی لاوازی پرۆ تورکيا لە ئەمريکا درووست بووە دژ بە ڕۆژئاوای کوردستانيش. گوایە دواجار ئەوان پەکەکەن و سەر بە ئێرانن، چ پێويست دەکات ئەو هەموو هاوکاری ماددی و مەعنەوییە بۆ ئەو گرووپە خەرج بکرێت.
یەکێک لەو دەنگانە ماوەی پێشوو نووسی بووی لە کاتی هێرشەکانی ميليشياکانی ئێران بۆ سەر ئەمريکا لە سووريا، هەسەدە بێ دەنگە و وەڵامی نييە، چونکە ئەوان سەر بە پەکەکەن و سەر بە ئێرانن، ئاماژەی بە هەسەدە و پەکەکە و یەکێتی دابوو وەک سێ هێزی سەر بە ئیران.
ئەم دەنگانە دەکرێت زیاتر بن، بە تايبەت دوای لاوازبوونی پشتگيرييە هەرێمايەتيەکە، سعووديە و ئيماڕات. جاران تورکيا لە ئەمريکا لۆبی دەکرد دژ بە ڕۆژئاوا، بەڵام هاوکات ئيماڕات و سعودييە لۆبيان دەکرد دژ بە تورکيا، واتە لە بەرژەوندی ڕۆژئاڤا. لۆبی سعوودييە و ئيماڕات لە ئەمريکا بەهێزترن لە هی تورکيا. لە ئیستادا لەوانەیە تەنيا لۆبی تورکيا بمێنێتەوە، لۆبی ئيماڕات و سعوودييە بوەستێت.
کەواتە جگە لەوەی ئەمريکا خۆی نيگەرانە لە کورد، تورکياش کار دەکات بۆ زیادکردنی ئەو نيگەرانييە، لە بەرامبەردا دەوڵەتێکی ناوچەیی نييە بەرژەوەندی هەبێت لە لۆبی کردن بۆ کورد لە چوارچێوەی دژایەتی ئێران و تورکيا و ئەسەد.
کەواتە بە پێچەوانەی ساڵانی پێشوو، کە هاوکێشەی نێودەوڵەتی و هەرێمایەتی لە بەرژەوەندی کورد بوو، ئێستا هەردووکی گۆڕاوە و لە بەرژەوەندی کورد نييە. لە دۆخێکی وادا ئەوەی دەمێنێتەوە کە زۆر گرنگە، بەڕای من لە هەندێک کاتدا گرنگترينە، ئەويش پشتگيری ناوخۆیە، واتە هاووڵاتيان. لە ناوخۆ، بە ڕوونی ديارە نيگەرانی و ڕق و توڕەییەکە تەنانەت لە هاوکێشە نێودەوڵەتی و هەرێمايەتيەکەش زیاتر دژی بەرژەوەندی حکومەتی هەرێمی کوردستانە.
لە ڕۆژئاڤاش دۆخەکە باشتر نييە، زۆر دەگمەنە کوردێکی ڕۆژئاوا بدوێنيت ڕازی بێت لە دۆخی ئابووری و سياسی ڕۆژئاڤا. لێرەدا زیاتر ئاماژە بە هەرێمی کوردستان دەکەم، چونکە گرنگترە و تاکە قەوارەی فەرمی کوردە لەم جيهانەدا، لاوازبوون یا داروخانی هەرێمی کوردستان، نەمانی ڕۆئاڤا تەنيا دەبێتە مەسەلەی کات.
پشتگيری ناوخۆ، کە پارتی و یەکێتی هيچ بایەخێکی پێنادەن، جگە لەوەی هۆکارێکی سەرەکييە بۆ بەدەستهێنانی پشتگيری دەرەکی، چونکە پشتگيری ناوخۆ حکومەت بەهێز دەکات، کە بە هێز بوويت ئەکتەرە نێودەوڵەتييەکان خۆیان ڕێزت دەگرن و دەخوازن پەيوەندييت لەگەڵ ببەستن. هاوکات هۆکارێکە بۆ خۆ پاراستن و بەرگری لە خۆکردن لەو کاتەی کە هاوکێشە هەرێمی و نێودەوڵەتييەکان دژی حکومەت دەبن.
ئەگەر لایەنی کەم ٦٠٪ی خەڵکی هەرێمی کوردستان پشتگيری نەوتی هەرێم بکەن، ئەوا حکومەتی هەرێم زۆر بە ئاسانی دەيتوانی بڵێ یا نەوتەکە خۆم دەيفڕۆشم یا دەيگرمەوە و کەسی تر بۆی نييە بيفڕۆشێت، ئەو کات خەڵکيش پشتگيری دەکرد و بەرگەی بێ مووچەیی و برسێتيان دەگرت. بەڵام ناکرێت ئەو داواکارييە لە خەڵک بکرێت، کە بایەخ بە مووچە و گوزەران نەدەن، هاوکات بارزانی و تاڵەبانييەکان ملياران دۆلاریان دەستکەوتووە و بەرپرسانی هەردوو حيزب، مانگانە بە مليۆنان دۆلار خەرج دەکەن لە قومار و کڕينی جی کڵاس و ژیانی سێکسی خۆیان.
هەرێم دەخرێتە بەردەم دوو بژاردە یا ڕادەستکردنەوەی نەوتی هەرێم بە خەزعەلی و ڕەيان کلدانی و حەسەن پلايز یان قەدەغەکردنی فڕۆشتنی نەوت ئەمەش واتە نەمانی هەرێم لە ڕووی واقعی و هێزەوە یان دارووخان لە ناوەوە
زۆر هەڵەین وا بزانين هۆکاری ئەوەی ساڵێکە سەرۆکێکی وەک زێلينسکی کە ئەکتەرێکی کۆميدی بێ ئەزموون بوو لە سياسەتدا، لە جەنگدایە بەرامبەر بە پوتين و سوپا گەورەکەی، تەنيا لەبەر ئەوەی ئەمريکا هاوکاری دەکات، هۆکاری سەرەکی لە پشت ئەوەی زێلينسکی توانيوویەتی زیاد لە ساڵێک بجەنگێت بەرامبەر بە پوتين و تەنانەت گورزی گەمەر شکێنی لێبدات، بريتييە لە پشتگيری ناوخۆی ئۆکڕانيا بۆ ئەو سەرۆک و حکومەتە. خودی هاوکارييەکانی ئەمريکا، هۆکارێکی بۆ ئەوە دەگەرێتەوە کە خەڵکی ئۆکڕانيا پشتگيری ئەو حکومەتە دەکەن و ئامادەن شەڕی رووسيا بکەن.
ڕووسيا هەشت مانگە لە شارۆچکەیەکی وەک باخموت کە دانيشتووانەکەی ١٠ هەزارە دەجەنگێت، ئەمە تەنيا بە هۆی هاوکارييەکانی ئەمريکاوە نييە، بەڵکو پشتگيری ناوخۆييە لە سوپا و حکومەت. ئەمرۆ ئەو پشتگيرييە نەمێنێت، سبەی دەبێت زێليسنکی سازش بۆ پوتين بکات. کوردستان بە زیاد لە دووسەد هەزار چەکدارەوە نەيتوانی دوو خولەک شەڕی هێزەکەی حەسەن پلايز بکات، کەرکوکيان پێشکەشکرد.
هەرێمی کوردستان لە دۆخێکی ئاڵۆز و قوورسدایە، بێ گومان ئێستا لەبەر ڕێککەوتنی سعوودييە و ئێران، تا ڕادەیەک ئەو ئاڵۆزی و مەترسيانە کەمتر دەردەکەوێت، چونکە لەوە دەچێت ئێران نەرمتر بێت و ڕێ دەدات سوودانی ڕێککەوتن لەگەڵ هەرێم بکات بۆ ماوەیەکی کاتی. بەڵام لە ئايندەیەکی نزيک، لەگەڵ سەرهەڵدانی بچوکترين کێشە لە نێوان هەرێم و بەغدا، یا لە نێوان هەرێم و ئێران، یا شکستهێنانی ڕێککەوتنی سعووديە و ئێران، ئەوا هەرێم دەکرێتە بەردەم دوو بژاردە یا ڕادەستکردنەوەی نەوتی هەرێم بە خەزعەلی و ڕەيان کلدانی وحەسەن پلايز، ئەمەش واتە نەمانی هەرێم لە ڕووی واقعی و هێزەوە، یا دارووخان لە ناوەوە.
چونکە ئەگەر عيراق و تورکيا هەرێم بکەنە بەردەم دوو بژاردە، یا فڕۆشتنی نەوت لە ڕێگەی سۆمۆ، یا قەدەغەکردنی فڕۆشتنی نەوت، هەردووکی بە ئەگەری زۆرەوە مانای داڕوخانی هەرێمی کوردستانە. بۆچی هەرێم خۆی کردە بەردەم ئەم دوو بژاردەیە، یان شکستهێنان یا شکستهێنان؟
بەرپرسی یەکەم لە پرسی نەوت بارزانييەکانن، یەکێتی لە پرسی نەوت زیاتر وەک بن ديوارە، مانگانە مليۆنان دۆلارەکەی خۆی وەردەگرت و سەری کز دەکرد. بارزانييەکان کێشەی گەورەیان ئەوە بوو چوونە یارييەکەوە کە یاريزانی ئەو گەمەیە نەبوون. پێش هەموو شتێک سياسەتی ئابووریی سەربەخۆ، خۆی لە خۆيدا باشترين و گرنگترين دەستکەوتە. بەڵام بە هەندێک مەرج کە بارزانييەکان هيچيان پەيرەو نەکرد:
١. تێڕوانينی کورد بۆ نەوت دەبێت جياواز بێت لە تێڕوانی عيراق و کەنداو بۆ نەوت. کورد دەوڵەتی نييە، کە دەوڵەتت نەبوو هەر وەک چۆن خاوەنی سەروەری و کەرامەت و ژیانی خۆت نيت، ئاواش خاوەنی سامانی سروشتی و خاکی خۆت نيت. واتە، کاتێک کوێت و عيراق تەواو پشت بە نەوت دەبەستن، ئەوە تەنيا هەڵەیەکی ئابوورييە، بەڵام کاتێک کورد وەک ئەوان پشت بە نەوت دەبەستێت، ئەوا جگە لە هەڵەیەکی ئابووری، هەڵەیەکی سياسی و ستراتيژی ترسناکە. جگە لەوەش، کورد لەسەر دەريا نييە، کە بتوانێت بێ خاکی دەوڵەتان نەوتەکەی هەناردە بکات.
کورد دەبوو بۆ ماوەیەکی زۆر کورت بە تەواوی پشت بە نەوت ببەستێت، تا ئەو کاتەی لە رێگەی داهاتی نەوتەوە کەرتی پيشەسازی و کشتوکاڵی و گەشتوگوزار و وەبەرهێنان و کەرتی تايبەت درووست دەکرا و گەشەی پێدەدرا، پاشان نەوت دەبوو بکرێت بە یەکێک لە سەرچاوەکانی داهات، نەک سەرەکيترين سەرچاوە. کێشەیەکی تری بارزانييەکان ئەوە بوو کە بەدەستهێنانی پشتگيری و هاوپەيمانێتیی تورکيایان کردە پێوەر بۆ پرسی نەوت نەک پشتگيری ناوخۆی هەرێمی کوردستان.
٢. کورد ئەگەر بۆ پەنجا ساڵيش نەوت بفڕۆشێت بێ کێشە، دەبێت بزانين لەبەر لاوازی عيراق و داگيرکەران و هاوکێشە هەرێمایەتی و نێودەوڵەتييەکانە، کە ئەوانە گۆڕان، مەحاڵە ڕێ بدرێت کورد ببێتە ئەکتەرێکی نێودەوڵەتی لە ئاسايشی وزە. دەبوو بەوپەڕی گومان و ترس و پلان و بێ متمانەیەوە سەيری نەوت بکەين، نەک وەک سەرچاوەیەک بۆ ئارامی و سەقامگيری.
٣. هەرێم بۆ ئەوەی نەوت سەربەخۆيانە بفڕۆشێت، جگە لە تورکيا ڕێگەی تری نييە بۆ هەناردەکردنی. کەواتە ئەگەر عيراقيش هەرگيز نەیەوێت نەوتی هەرێم ڕابگرێت، ئەوا تورکيا هەميشە ئامادەیە ڕايبگرێت ئەگەر هەست بە مەترسی بکات. چۆن سەرچاوەی ژیانی خۆت دەبەستيتەوە بە گەورەترين دووژمنی خۆت؟! تەنيا ئەم خاڵە دەبوو وا لە بارزانييەکان بکات، کە نەوت هيچ گرەنتييەکی نييە. لە ماوەی ئەم چەند ساڵەدا، لەوانەیە لە دە نووسينمدا ئاماژەم بەم خاڵە کردبێت.
٤. کێشەی تێگەيشتن لە دەوڵەت. بارزانييەکان لەسەر بنەمایەکی عەشایەری و خێڵەکی مامەڵە لەگەڵ هەندێ پرسی سياسی گرنگ دەکەن، بەڵام ئەو پرسانە تەواو زانستين. بارزانييەکان ئەو متمانەیی بە تورکيایان هەبووە، متمانەیەکی تەواو هەڵە و کوێرانە بووە. سروشتی دەوڵەت وایە، بەرامبەرەکەی ئەگەر دەوڵەت نەبوو، لای ئەو ئامرازێکی هيچ وپووچە و بەکاری دەهێنیت تا ئەو کاتە پێويستی پێيەتی.
تورکيا وەک خێڵ یا بەکرێگيراو سەيری بارزانيەکان دەکات، نەک وەک بڕياربەدەستی دەوڵەتی. ئەمە نە سووکایەتييە نە ڕەخنە، شتێکی سروشتييە و دەوڵەت بە سروشت وایە، بە تايبەت ئەگەر ئەو دەوڵەتە تورک بێت و بەرامبەرەکەیان کورد بێت! ئەم تێڕوانينەی تورکيا بۆ بارزانييەکان و بۆ هەرێم، لای بارزانييەکان هەستی پێنەکرا، وایان دەزانی تورکيا وەک دەوڵەت مامەڵەیان لەگەڵ دەکات. ئەو هەموو متمانەیی بارزانييەکان بە تورکيا، دەرکەوت چ هەڵەیەک بوو، دوای بڕيارەکە تورکيا ڕاستەوخۆ بە عيراقی ڕاگەياند، بە بێ ڕەزامەندی ئێوە نەوتی هەرێم نافڕۆشين وناكڕين. دەيان جار لە نووسينەکانمدا ئاماژەم بەم خاڵەش کردوە.
٥. کێشەیەکی تری بارزانييەکان ئەوە بوو کە بەدەستهێنانی پشتگيری و هاوپەيمانێتیی تورکيایان کردە پێوەر بۆ پرسی نەوت، نەک پشتگيری ناوخۆی هەرێمی کوردستان. ئەگەر پشتگيری ناوخۆ هەبوایە، هەرگيز حکومەتی هەرێم لەم دۆخە لاوازەدا نەدەبوو. پشتگيری ناوخۆ بەوە بەدەست دەهات کە داهاتی نەوت بۆ بەژەوەندی گشتی هەریمی کوردستان بوایە، ئەمەش واتە دەوڵەمەند نەبوونی بارزانی و تاڵەبانيەکان، بەڵکو دەوڵەمەندبوونی هەرێمی کوردستان.
٦. کاتێک پشتگيری دەرەکی و ناوخۆ نييە بۆ حکومەتێک، ئەوا حکومەت دەبێت پشت بە هێزی خۆی ببەستێت، واتە هێزی چەکداریی خۆی بۆ بەرپەرچدانەوەی دووژمنەکانی. لەمەشدا حکومەتی هەرێم هێزی چەکداری نييە. ڕاستە زیاد لە ٢٠٠ هەزار چەکدار هەیە لە هەرێمی کوردستان، بەڵام تەنانەت دوو چەکداریان سەر بە هەرێمی کوردستان نين! هی حيزب و کەس و لایەنن، هەر یەکەو لە ژێر هەژموونی دەوڵەتێکی داگيرکەرە. ئەمە دەکرێت بکرێت بە تيۆرييەک و جێبەجێ بکرێت بەسەر زۆر دەوڵەتدا: لە هەر وڵاتێکدا زیاد لە هێزێک هەبوو، واتە زیاد لە حکومەت یا دەزگایەک کە هێزی وڵات قۆرخ بکات، هێزێکی تر هەبوو ئەوا هەردوو، یا هەموو هێزەکان سەر بە دەوڵەتانی ترن و بە پێی سياسەتی ئەوان ئاڕاستە دەکرێن. ئەم تێۆرييە جێبەجێ بکە بەسەر لوبنان و عيراق و یەمەن و ليبيا و سووريا وفەلەستين، زیاد لە لایەنێک هێزی چەکداری هەیە، هيچيان هی دەوڵەتەکە نييە، هەر هێزە و سەر بە دەوڵەتێکە و بەکرێگيراوە.
پارتی و یەکێتی پێويستە واز لەو تێڕوانينە بهێنن کە سياسەت واتە جاشایەتی بۆ دەوڵەتێکی داگيرکەر و ئابووری واتە گەندەڵی و دزی
بۆیە تا ئەو دەوڵەتانەی کە ئەو هێزە لۆکاڵيانە بەڕێوە دەبەن ڕێکنەکەون، ئەوا ئەو دەوڵەتانە ڕزگاريان نابێت لە شەڕی ناوخۆ. هەمان تيۆری جێبەجێ بکە بەسەر ميسر و تونس، ئەنجامی پێچەوانەی دەبێت، کە هاوشێوەی یەمەن و ليبيا و سووريا سەر بە بەهاری عەرەبی بوون و بەڵکو ئەوان تەنانەت دەستپێشخەريان کرد، بەڵام نەکەوتنە ناو شەڕی ناوخۆ و دەريای خوێن وەک وڵاتەکانی تر، چونکە تا ئەمرۆش یەک هێزی چەکدار هەیە.دەوڵەتان تەدەخولی زۆريان کرد لە تونس و ميسر، هاوشێوەی تەدەخولەکانیان لە سووريا و یەمەن و ليبيا، بەڵام لەبەر ئەوەی هێزی چەکدار یەک بوو، بەرەو شەڕی ناوخۆ نەچوون.
دەستتێوەردانی دەوڵەتان لە تونس بووە مایەیی شەڕی ناو پەرلەمان و ململانێی نێوان سەرۆک و پەرلەمان، لە ميسر بووە مایەیی کودەتا، نەک شەڕی چەکداری.
٧. لەبەر ئەو هۆکارانەی سەرەوە، نەوتەکە کە هی خودی هەرێمی کوردستانە، بووەتە کارتێکی فشار بەدەست دووژمنانەوە دژ بە کوردستان. لە کاتێکدا دەبوو هەرێمی کوردستان وەک کارتی فشار دژ بە تورکيا بەکاری بهێنێت. بەڵام ناتوانێت، چونکە تورکيا بە بێ نەوتی هەرێمی کوردستان تەنيا زیان دەکات و بە ماوەیەکی کورت دەتوانێت بەديل بدۆزێتەوە بە چەند ميلۆن دۆلارێک گرانتر، بەڵام هەرێمی کوردستان نەوت نەفڕۆشێت، مووچەی پێنادرێت و لە ناوخۆوە و هەڵدەوشێتەوە.
ئایا دەبێت چی بکرێت؟ من لەو کەسانەم کە لە ژیانما سوودی یەک سەنت دۆلارم نەبينيووە لە نەوتی هەرێم، بەڵام سەدان ئەوەندەی ئەوانەی کە ملياران دۆلاریان دەستکەوتووە لەو نەوتە، ئەو نەوتەی هەرێمم بەلاوە گرنگە و مانەوەی بەدەست هەرێمی کوردستانەوە بە پرسێکی پيرۆز دەزانم.
١. دەبێت هەموو هەوڵێک بدرێت سياسەتی نەوت لە ژێر دەسەڵاتی هەرێمی کوردستان بمێنێتەوە. ئەمە دەکرێت سەرەتا ئەم دۆخەی لە عيراق و نێوان ئێران و سعوودييە ئێستا هەیە بقۆزرێتەوە. ڕێککەوتنێک بکرێت لەگەڵ بەغدا بە بێ ڕادەستکردنەوەی نەوتی هەرێم، واتە داهاتی نەوت ئاشکرا بکرێت بۆ خەزعەلی و حەسەن پلايز، بەڵام نەوتەکە لە ڕێگەی کۆمپانياکەی ئەوانەوە کە سۆمۆیە نەفرۆشرێت.
لە ماوەیەکی کورت پلانێک دابنرێت بۆ ئەو کاتەی کە دادگای باڵای حەشد بڕيارێکی تر دژ بە هەرێم دەدات کە نەوتەکە یا دەوستێنرێت یا لە ڕێگەی سۆمۆە دەفڕۆشرێت. ئەم بژاردەیە ئەمرۆ نەبێت سبەی دەخرێتە بەردەم هەرێم، بۆیە دەبێت بە زووترين کات پلانێک بۆ ئەمە هەبێت.
٢. پارتی و یەکێتی بە ملياران دۆلاريان هەیە، هيچ نەبێت لەبەر بەرژەوەندی خۆیان، لەگەڵ داهاتی ناوخۆ بۆ ماوەیەکی کاتی بتوانن مووچە دابين بکەن، لە ئەگەری ئەوەی هەرێم کرایە بەردەم ئەو دوو بژاردەیە، ئەوا هەرێم دەبێت فڕۆشتنی نەوتەکەی ڕابگرێت نەک ڕادەستی ڕەيان کلدانی بکاتەوە، بۆ ئەمەش دەبێت مووچە دابينبکرێت.
٣. لە بری جنێۆدان بە کۆنسولی ئەمريکا، پێويستە هەوڵبدرێت گفتوگۆیەکی جدی لەگەڵ ئەمريکا بکرێت، داواکارييەکانی ئەمريکا کە لە سوودی هەرێمە، وەک یەکگرتنەوەی هێزە چەکدارەکان و هەبوونی یەک حکومەت و سەربەخۆیی دادگاکان، کاری جديان لەسەر بکرێت بۆ بەدەستهێنانەوەی پشتگيری ئەمريکا، کە لە دوای پشتگيری ناوخۆ، گرنگترينە. پارتی هەميشە مل شۆڕ دەکات و مووشەکباران و داگيرکارييەکانی تورکيا و ئێران قبوڵ دەکات، با پۆست کردنی وتارێک لە لایەن کۆنسولی ئەمريکاوە قبوڵ بکات. با هەر وا حيسابی بۆ بکات کە بنکە سەربازييەکانی تورکيایە لە بادينان و مووشەکەکانی حەشد و پاسداران و ڕەيان کلدانييە بۆ سەر هەولێر. ئایا لەسەر ئەو ڕووداوانە پارتی هەرگيز سەدا یەکی ئەم هێرشەی کردوەتە سەر کۆنسولی تورکيا و ئێران لە هەرێم کە دەيکاتە سەر کۆنسولی ئەمريکا!
٤. پارتی و یەکێتی پێويستە واز لەو تێڕوانينە بهێنن کە سياسەت واتە جاشایەتی بۆ دەوڵەتێکی داگيرکەر و ئابووری واتە گەندەڵی و دزی. ناوخۆی هەرێمی کوردستان خەريکە بەتەواوی لەدەست دەردەچێت، فکری دژایەتی نيشتيمان و فکری داعشی و بەعسی ڕۆژ بە ڕۆژ کوردستان دەتەنێت. ئەمە هۆکارێکی هەواڵگری دەوڵەتانی داگيرکەرە، هۆکارێکی گەندەڵی و تاڵانچێتی پارتی و یەکێتييە.
جگە لە هۆکاری مێژووی و کۆمەڵایەتی. هەرێم بروخێت، پێش هەمووان بەسەر بارزانی و تاڵەبانی دەروخێت، ئەگەر دەوڵەتانی داگيرکەريش دەستيان بۆ نەبەن، ئەوا هاووڵاتيان دەستيان لێ ناپارێزن. هەموو ئەمە تەنيا بەوە دەکرێت کە بەرژەوەندی گشتی بکرێتە بنەما بۆ سياسەت و ئابووری.
٥. فڕۆشتنی نەوتی هەرێم بەردەوام دەبێت، بەڵام بۆ ماوەیەکی کاتی. گومانی تيا نەما کە دادگای باڵای حەشد، سەد لە سەد لە لایەن پاسدارانەوە بڕيارەکانی دەدات. پێش ماوەیەک بڕياری دا کە هيچ بڕە داهاتێک نابێت بۆ کوردستان بنێردرێت، بەڵام ئێستا دەينێرن چونکە ئێران لەگەڵ سعوودييە ڕێککەوتووە و دەيەوێت سياسەتی نەرمتر بکات. هەر ئێران گەڕایەوە بۆ فشارەکانی، دادگاکەی حەشد دەست دەکاتەوە بە حەپە حەپە دەستوورييەکانی.
ئەگەر پارتی و یەکێتی نەوتی هەرێم ڕادەستی حەشدی شەعبی بکەنەوە، ئەوا نەک هيچ شەرعيەتێکيان نامێنێت، کە ئێستاش نيانە، بەڵکو ئەو کات پێويستيەکی نەتەوەیی و مێژوویيە نەک لاببرێن بەڵکو دادگایی بکرێن و سزا بدرێن.
چ مانایەکی تيایە زیاد لە ١٠ ساڵ پارەی نەوت بدزن و بە هۆی نەوتەوە ئابووری کوردستان وێران بکەن و کۆمەڵگە گەندەڵ بکرێت، و پاشان نەوتەکەش لە نەوەکانی داهاتووی کورد بەسەننەوە و بيدەنەوە بە حەشد. ئەمە گەورەترين تاوان و خيانەتە کە سياسی بەرامبەر بە نەتەوە و نيشتيمانەکەی بيکات.
