(كاك عەلی حەمەصاڵح) و چەند تێبینییەك:
د.هیوا تاوگۆزی ـ پسپۆری كۆمه‌ڵناسی
ناتوانم مێژویەك لە سیاسەتی كوردیدا دیاری بكەم كە بە حیزبێك یان ڕەفتاری سیاسیەك سەرسام بوبم، بەڵام لەم ساڵانەدا (كاك عەلی حەمەصاڵح) سەرنجی ڕاكێشاوم، ڕاستە ئەو چوارچێوەیەكی ئەخلاقی بەناوی (هەڵوێست)ەوە ڕاگەیاندوە، بەڵام هاواری ئەو لە هەڵوێست گەورەترە و دەنگی هەزاران گوێ دڵخۆش دەكات كە دورو نزیك پەیوەندیان بە (هەڵوێست)ەوە نییە.
كاتێك كاك عەلی لەم چركەساتی نائومێدیەدا دێتە مەیدان، خەڵكێكی زۆر سڵ لە ڕەوتەكەی دەكەنەوە، ئەمەش پەیوەندی بە مێژووی ماندوكردنی خەڵكەوە هەیە لەلایەن سیاسیەكانەوە، ئەگینا كاك عەلی سیاسیەكی بەئەخلاقی خۆماڵییە كە (تا ئەمرۆ) لەگەڵ ئاووهەوای سیاسی و كۆمەڵاتی كوردستان سازگارە و دەكرا پێشوازییەكی گەرمتری لێ بكرایە.
جوانی ئەو لەوێدایە كە ئیسلام و مزگەوت بەكارناهێنێت بۆ ڕاكێشانی عەتفی دینداری ئێمە، جوانی ئەو لەوێدایە كە كلتورییە، بە ئەدەبە، خاوەنی چەك و زوڵم نییە، ئەو دەیەوێت هەیكەلی كاریزما بڕوخێنێت و ئەخلاق و عەدالەت لە جێگەیدا بڕوێنێت.
ئەو بڵندگۆی ناخی ملیۆنان خەڵكە بۆ گەیاندنی سكاڵا و دەنگە كپكراوەكانیان، ئەو لەگەڵ هاژەی ناو بۆری نەوتی قاچاغدا، ژاكانی منداڵێكی برسیكراوی غەزەش دەبیستێت، ئەو لەگەڵ خرچەی كاغەزی سەرمێزی چەتەكان، خرمەی گەڵای ژێرپێی گەریلا و كوردانی ڕۆژئاوایش دەبیستێت.
هاواری كاك عەلی بۆ پارتیەك لە پێش هاواری بارزانییەكانە بۆ ئەو پارتییە، هەروەك چۆن بەرزتر لە تاڵەبانییەكان خەمی یەكێتیەك لە گەروویدا دەزرەنگێتەوە، هاواری ئەو كاتێك بەرزترە كە هاواری ئۆپۆزسیۆن بە بەرژوەندییەكانی دەسەڵاتەوە قوڕمیش كراوە، هاواری ئەو لە هاواری ئەو سیاسیانە ناچێت كە بەرەبەیانیەكانی هەڵبژاردن ژێكانیان پاك دەكەنەوە بۆ چڕین.
لێرەدا و لەم سەردەمی بەسەرچونی ستایش و پیاهەڵدانی بەرپرس و كاربەدەستاندا، نامەوێت درێژە بەم چەشنە داڕشتنە ئەدەبییە بدەم و دەمەوێت چەند ستراتیژییەك بۆ كاك عەلی بەجێبهێڵم كە بەدڵنیاییەوە بەبێ ئەوان ناتوانێت لە ئایندەدا ڕەوتێكی درەوشاوە و كاریگەری هەبێت: 
كاك عەلی سیاسیەكی بە ئەخلاقی خۆماڵییە كە (تا ئەمرۆ) لەگەڵ ئاووهەوای سیاسی و كۆمەڵاتی كوردستان سازگارە
🔸 كاك عەلی؛ دەسەڵات بۆ نالەرزێت كاتێك فایلەكانیان ئاشكرا دەكەیت؟ ئایا دەسەڵات تۆ نابیستێت؟ ئایا نازانێت تۆ ڕایەڵەیەكی باشیت لەنێوان گەندەڵی ئەوان و ناخی پاكی خەڵكدا؟ ئەو دەبیسێت و دەبینێت و برینداریش دەبێت، بەڵام ئەو لەسەر پرەنسیپی ماندوكردن كار دەكات، هێندە صابیرە تا تۆ دەنگت دەنوسێت، هێندە ئارامگرە تا خەڵك لەدەنگت بێزار دەبێت. بەو مانایەی ئەگەر سەمفۆنیایەكی زۆر بەچێژیش بیت دوای سێ سەعات ئیتر گوێگر لێت هەڵدێت. خەڵك ئیتر ماندو بوە كە بۆ چەندەمین جار ڕێڕەوی تەنكەرەكانی قاچاغیان بۆ باس بكەیت، یان قازانجی زەبەلاحی نادیاری سەرانی حیزب یان گرێبەستی ژێربەژێر، سەفەر، زەوی تاڵانبرن، بۆری ڕاكێشراو و پارەی قومار.
ئەمانە گەیشتون بە كۆتاییەكانی سەعاتی سێهەمی سەمفۆنیاكە، واتە خەڵك بە ئەندازەی بێزاری لە بینینی دزی و تاڵانبردنی سامانی نیشتیمانی، لە تۆنی ژەنراوی دوبارەی هاوارەكانی بەڕێزیشت بێزار دەبێت، وە تەنها حل ئەوەیە ڕیتم و مەقام و تۆنەكان لەلایەن مایسترۆكانتەوە (ڕاوێژكارەكان) بگۆڕیت. تا هەم دەسەڵات صەبر لە دەست بدات، هەم گوێی خەڵك ئارام بێتەوە.
🔸 هەڵوێست چ ستراتیژ و سیاسەتێكی هەیە؟ ئایا ئەوەی لەسەری دەڕۆیت ستراتیژێكی پەروەردەییە یا ئاینیە یا نیشتیمانییە یا ئابوریە یا یا ؟. خەڵك تا نەزانێت هەنگوین هی شاخە یان هی ماڵانە نایكڕێت، خەڵك تا نەزانێت تۆ ستراتیژیت چیە بە یەقینەوە لێت كۆنابێتەوە، وە ئەمە ئەو نوكتەیە دوای چەند ساڵێك وەك بزوتنەوەی گۆڕانت لێ دەكات یان وەك نەوەی نوێی چەند ساڵی داهاتوو. هەر ئەم نوكتەیە كە یەكێتی و پارتی لە چوارچێوەی ستراتیژی نیشتمانیدا هێشتەوە تا ئەمڕۆ، یان ئیخوانی وەك هەژمونێكی پەروەردەیی گەیاندە ئێستا. بەڵام كاتێك ئیخوان لە پەروەردەوە هاتە نێو سیاسەت بە هەزاران كەسی لێ هەڵوەری لەڕووی ستراتیژی بەڕێوەبردنەوە لاواز بوو، بەپێچەوانەی پارتی و یەكێتی كاتێك ستراتیژیان لە نیشتیمان و كلتورەوە گۆڕی بۆ سیاسەتی ئابوری و بەسەنتەریكرنی مەعاش، بەهێزتربوون.
🔸 شانازیكردن بە بوونی یەك میدیا (پەیج) نوكتەی بەهێزی ڕەوتەكەتان نییە، بەڵكو نوكتەیەكە وا دەكات دەنگی یەك پەیج لەنێو هەزاران پەیجی ڕاستی و فەیكی دەسەڵاتدا باش نەبیسترێت، یان لێڵ بكرێت. واتە تەنها میدیایەك ناتوانێت هیوایەك بێ بۆ چاكسازی كۆمەڵگایەكی لە سیاسەت چەقیو.
🔸 وە ڕێكنەخستن و فراوان نەكردنی سنوری دیبلۆماسی بۆ دەرەوەی هەرێم و ...
🔸 نەدۆزینەوەی ئەو خاڵە سەرەكیانەی كە دەكرێت حكومەتی هەرێم تا ئێستا باش ئیدارەی كردبێت و جێگای سوپاس و پێزانین بێت، واتە كۆی پرۆِسەكە نەگەتیف و سەنگەرگرتن نەبێت بەرامبەر دەسەڵات، چونکە خراپ پیشاندانی ئەو، مانای جوانی تۆ ناگەیەنێت.
