تایبەت ـ ماڵپەری پۆلەتیك
بەپێی زانیارییەكانی ماڵپەری پۆلەتیك هاوپەیمانیيەكەی یەكێتی و گۆڕان جگە لە خاڵە ئاشكراكانی، خاڵی نهێنیشی تێدایە كە بە شەفەهی لەسەری ڕێكەوتوون و بۆ ڕایگشتی ئاشكرا نەكراوە بە جۆرێك تەنها چەند كەسێك لە هەردوولا ئاگادارن.
ماڵپەری پۆلەتیك زانیویەتی یەكێتی لە چەند ڕۆژی ڕابردوودا بڕی پێنج ملیۆن دۆلار (500 دەفتەر)ی داوە بە بزوتنەوەی گۆڕان، ئەوەش وەك جێبەجێكردنی بەشێكی نهێنی ڕێكەوتنەكەی نێوانیان بووە.
مەبەست لە پێدانی ئەو پارەیەش بۆ ئەوەیە بزوتنەوەی گۆران لە ماوەی هەڵمەتی بانگەشەی هەڵبژاردن بۆ ئیشوكار و بانگەشە و خەرجی میدیاكان و كاندیدەكانی بەكاریبهێنێ، لە كاتێكدا گۆران تەنها بە 7 كاندیدەوە بەشداریی هەڵبژاردن دەكات.
هەر بەپێی زانیارییەكان، بزوتنەوەی گۆران سەڵاحیەتی چۆنیەتی دابەشكردن و خەرجكردنی ئەو پارەیەی داوەتە چیا و نما (كوڕانی نەوشیروان مستەفا) بە ڕاوێژ لەگەڵ تیمی سەرپەرشتیاری بانگەشەی هەڵبژاردنی گۆڕان.
جگە لەوەش، لەو ڕیكلامە گشتیانەی بۆ لیستی هاوپەیمانی كوردستان دەكرێن لە تەلەڤزیۆن و میدیا و ماڵپەر و پۆستەری سەر شەقامەكان هەموو بودجەكەی لە لایەن یەكێتییەوە دابین دەكرێت و پەیوەندی بەو 5 ملیۆن دءلارەوە نییە.
هەروەها ماڵپەری پۆلەتیك زانیویەتی، بەشێكی دیكەی ڕێكەوتنە ئەوەیە، لەو پشك و پۆستانەی بەر یەكێتی دەكەوێت لە پێكهێنانی حكومەتی داهاتووی عێراق بزوتنەوەی گۆڕانیش بەشی دەبێت و یەكێتی بەڵێنی یەكلاكەرەوەی پێداون.
هەر بۆیە لە ئێستاوە لە گردی زەرگەتە كێبڕكێ لە نێوان هەڵسوڕاوە دیارەكانی گۆران دەستیپێكردووە بۆ وەرگرتنی پۆست لە بەغدا لە ڕاوێژكارییەوە بۆ بەڕێوەبەری گشتی و دیوانی وەزارەتەكان و بریكاری وەزارەت و پۆستی دیپلۆماسی و باڵوێزخانەكان.
یەكێتی نیشتیمانی كوردستان و بزوتنەوەی گۆڕان بۆ هەڵبژاردنی پەرلەمانی عێراق پێكەوە لە ناو لیستی (هاوپەیمانی كوردستان) بەشداریی دەكەن، لە 20ی حوزەیرانی ڕابردووش ڕێكەوتنەكەیان ئیمزا كرد و لاهور شێخ جەنگیش كرا بە سەرۆكی، بەلآم دوای ڕووداوەكانی 8ی تەموز دەستیلەكاركێشایەوە و قوباد تاڵەبانی كرایە سەرۆكی هاوپەیمانییەكە.
