ته‌وژمى سپی پێستە بە ڕەچەڵەک ئەوروپییەکان

دیارده‌ی تره‌مپ.. گه‌ڕانه‌وه‌ بۆ سه‌رده‌می سپی پێسه‌ته‌كان

ماڵپه‌ری پۆله‌تیك 2021.01.07 08:31 PM
136 جار خوێندراوەتەوە

ماڵپه‌ری پۆله‌تیك

میدیایه‌كی بابه‌تیی بێلایه‌نه‌

دەمێکە مێژونوسان لە دەوری دوو بۆچون دەربارەی کەسە گرنگەکانی ناو مێژو دەخوڵێنەوە، کە ئایا ئەوانە دەرکەوتەیەکی دەگمەنن (استثنا‌) یاخود زەقترین دەرکەوتەی تەوژم و ئاڕاستەی کۆمەڵایەتی و سیاسی سەردەمی خۆیانن.
نمونەی زۆربەی ئەو کەسایەتیانەی کە جێگەی دەستیان بەسەر مێژوی گەلانی خۆیان و جیهان بە شێوەیەک لە شێوەکان دیارە، ئەوە دەسەلمێنن کە نە هیچ کەسێک دەتوانێت بەبێ بونی زەمینە و پێشمەرجەکانی تەوژمێکی تازە، ببێتە پێشڕەو، نە هیچ ئاراستەیەکی سیاسی و کۆمەڵایتی بێ پێشڕەویی کەسێک، کە کۆی مەرجەکانی ئەم ئاڕاستەیە بە باشترین شێوە بەرجەستە دەکات، توانیویەتی لە گۆڕانکاری بنەڕەتی یاخود دانانی کاریگەری لەسەر کۆی پرۆسەی سیاسی و کۆمەڵایەتی سەرکەوتو بێت. تره‌مپ ئایكۆنی شه‌پۆلی گه‌وره‌ی پۆپۆلیزمی سپی پێسته‌كان بوو

 

بۆیە ئەوەی لە ئەمریکاش رودەدات، تەنها ترەمپ بە تەنها نییە، بەڵکو تەوژمێکی تێکەڵە لە هەمو ئەو کەسانەی کە هەست دەکەن، پێگە و بەرژەوەندیان بە هۆی گۆرانکاریە دێموگرافیەکانی ئەمریکا و پێگەی ئەمریکا لە هاوکێشە جیهانیەکان لەژێر مەترسیدایە. 
پێکهاتەیەکی سەرەکەی ئەم تەوژمەش، سپی پێستە بە رەچەڵەک ئەوروپیەکانن، کە خۆیان بە دامەزرێنەری ئەمریکا دەزانن و پێیان وایە، ئەمریکا بەهۆی کۆچ و پێگەیشتنی نەوەی دوەم و سێیەمی کۆچبەرە غەیرە ئەوروپیەکان، ئەو ئەمریکایە نەماوە کە دایک و باوانی ئەوان دروستیان کردوە. 

بەرەی ترەمپ بە ئاشکرا کار بۆ سەرداری سپی پێستەکان بەسەر سیاسەت و ئابوری ئەمریکا دەکات


بێگومان ئەم بوچونە رەها نییە و رێژەییە، چونکە هەم لەناو دیموکراتەکانیش کەسانێکی زۆری سپی پێست هەن کە بروایان بە پێکەوەژیان هەیە و دەنگیان دژی ترەمپ داوە، هەمیش لە بەرەی ترەمپ کەسانێکی رەش پێست و چینی و لاتینی و رۆژهەڵاتی ناوەراست هەن، کە دەنگیان بۆ ترەمپ داوە، بەڵام ئەوەی ئاشکرا و زەقە، بەرەی ترەمپ بە ئاشکرا کار بۆ سەرداری سپی پێستەکان بەسەر سیاسەت و ئابوری ئەمریکا دەکات، لە کاتێکدا دیموکراتەکان زیاتر کار بۆ پێکەوەژیانی هەمو رەنگەکانی ئەمەریکا دەکەن. 
بۆیە دەکرێت بڵێین، دەگمەنی ترەمپ لەوەدایە کە زەقترین دەرکەوتەی ئەم تەوژم و ئاڕاستە کۆمەڵایەتی و سیاسیەی ئەمەریکایە و مەرجەکانی ئەم تەوژمەش بە باشترین شێوە بەرجەستە دەکات. 
تێبینی: هۆکاری تری زۆری ئابوری و کۆمەڵایتی و سیاسی بۆ تەوژمی ترەمپیزم هەیە کە چاودێران باسی دەکەن، بەڵام من تەنها باسی یەک هۆکارم کردوە.
ئاراس مه‌سیفى


دوایین بابەت

زۆرترین خوێندراو

  • ڕۆژ
  • هەفتە
  • مانگ