ئه‌م رۆژهه‌ڵاتی ناوه‌ڕاسته، هێزه سیاسیه‌كانی هێنده دڕنده‌و گوناح و لاوازو خوێنمژو خۆفرۆشن، كاتێك قۆناغ به‌قۆناغ، رووداو به‌رووداوی مێژووه‌كه‌ی هه‌ر له‌سه‌ره‌تای دروستبوونی نه‌خشه‌كه‌ی ده‌خوێنیته‌وه، بۆت ده‌رده‌كه‌وێت، مرۆڤایه‌تی له‌به‌رده‌م چ هه‌ڕه‌شه‌یه‌كی گه‌وره‌یه، ئه‌ڵبه‌ته فیتنه‌ی زلهێزه‌كان و خۆرئاواییه‌كانیش بێ به‌شنه‌بوون له‌دروست كردنی ئه‌م دۆزه‌خه بۆ گه‌نه، هه‌رچه‌ند پێوه‌ر بۆ هه‌ر هه‌ڵه‌یه‌ك په‌یوه‌ست ده‌كه‌م به چۆنیه‌تی بیركردنه‌وه‌و داڕشتنه‌وه‌ی هێزو توانای سیاسی تاك و كۆمه‌ڵگه‌كه‌ی.
هه‌رچه‌ند مێژووی رۆژهه‌ڵاتی ناوه‌ڕاست، به‌كه‌می بێ به‌ش نه‌بووه، له‌سیاسی لێهاتوو حه‌كیم، به‌ڵام به‌شێوه‌یه‌كی گشتی و به‌لێكدانه‌وه‌یه‌كی ساده ئه‌و پرسیاره‌ت بۆ ده‌رده‌كه‌وێت، ئاخۆ بۆ شه‌ڕو ئاگرو ئاسن له‌خاكی ئه‌م نه‌خشه‌یه نابڕێت؟، بۆچی زۆر ئاسانه كوشتنی مرۆڤ؟، بۆچی ئاسانه خۆفرۆشی و دیلی و كۆیلایه‌تی؟، له‌وانه‌یه كۆمه‌ڵه هۆكارێكی هه‌نووكه هه‌بن ئه‌گه‌رش زیاتر رۆنه‌چینه ناو بابه‌ته‌كه‌وه زۆر به‌سانایی بۆمان ده‌رده‌كه‌وێت، گه‌شه‌ی عه‌قڵ و نه‌فه‌س كورتی سیاسی و تاكه‌كانی به‌و كاریگه‌ریه ئاینی و خێڵه‌كی و دووربوون له‌زانست و حه‌زی پاوانخوازییه هێنده ئیفلیج بووه، هه‌میشه له‌هه‌ر قۆناغێك ئه‌گه‌ری سه‌رهه‌ڵدانی جه‌لادو بكوژو خوێنمژ له‌ئارادا هه‌بووه، له‌وانه‌یه سه‌دام و به‌شارو داعش و چه‌ندینی تر وه‌ك ئه‌وان له‌ناو ئه‌م مێژووه بۆ گه‌نه‌دا خۆیان مه‌ڵاس دابێت.
هه‌میشه ئایده‌لۆژیایه‌كی كوشتارو ئه‌شكه‌نجه و كۆیله‌كردن و رفاندن و ئه‌تكردنی ژنان و تێپه‌ڕین به‌ئاسانی به‌سه‌ر جه‌سته‌ی منداڵان له‌ناوچه‌كه‌دا هه‌بووه، كه به‌پێی مێژوو پرسیار گه‌لێكی له‌سه‌ر ده‌سه‌ڵاتی ئیسلامی و ململانێی مه‌زهه‌بی جێهێشتووه، كه‌هه‌ر ئه‌وه‌ش وایكردوه زلهێزێكی وه‌ك ئه‌مریكاو خۆرئاواییه‌كان سودی لێوه‌ربگرن و له نێوه‌ندی دامه‌زراندن و دروستكردنی چه‌ندین گروپی جیاواز هه‌ر رۆژێك هه‌ر ساتێك بیانه‌وێت به‌تایبه‌ت له‌و وڵاته‌ی كه كرۆكی ململانێیه‌كانه واته عیراق، ئاژاوه دروست بكه‌ن، ئیتر به‌بێ هیچ گوێدانه قوربانیه‌كانی شه‌ڕو به‌بێ گوێدانه ئه‌وه‌ی منداڵ یان ژن یان پیاو یان هه‌ركه‌سێك ده‌كوژرێت، سه‌ر ده‌په‌ڕێندرێت، ده‌سوتێندرێت، هه‌رجۆرێك له تاوانی قێزه‌ون كه‌جێبه‌جێ ده‌كرێت.
هه‌ڵای دیموكراسی و بانگه‌شه‌ی دیموكراسی له‌رۆژهه‌ڵاتی ناوه‌ڕاست، هه‌میشه هێزێكی لاواز بووه، بۆچی؟، له‌به‌ر ئه‌وه‌ی به‌رده‌وام ئایده‌لۆژیایی ئاین و نه‌ریتی خێڵه‌كی و پیاو سالاری و لاوازی تاكی رۆژهه‌ڵاتی ناوه‌ڕاست هه‌میشه هه‌ڕه‌شه‌یه‌كی گه‌وره‌بوون بۆ مرۆڤایه‌تی، كه دوژمنه‌كانیان به‌ئاسانی بتوانن به‌چه‌ندین بیانووی جۆراوجۆر به‌كاریان بهێنن و ئه‌وه‌یان بیه‌وێت له‌گۆڕه پانه‌كه‌دا بیكه‌ن، بۆنمونه، هه‌ڵای دیموكراسی له‌كوردستان چ مانایه‌كی هه‌یه له‌سه‌ر دوو ده‌ست ته‌ڕه‌تیزه یان پارچه زه‌ویه‌ك 10 كه‌س بكوژرێن؟، یان ژماره‌ی چه‌ك و ته‌قه‌مه‌نی له‌ژماره‌ی ئه‌و كتێبێانه زۆرتر بێت رۆژانه له‌بازاڕه‌كاندا ده‌فرۆشرێن؟.
به‌گشتی، ئه‌و شه‌ڕو شۆڕو خوێنڕێژیه‌ی له‌رۆژهه‌ڵاتی ناوه‌ڕاستدا هه‌یه، جگه له‌وه‌ی ده‌ستێكی ده‌ره‌كی بۆ به‌رژه‌وه‌ندی سیاسی و جوگرافیایی و ئابوری له‌ناوچه‌كه‌دا كار ده‌كات، هاوكات لاوازی تاك و گروپ و كۆمه‌ڵگه‌یی له‌رۆژهه‌ڵاتی ناوه‌ڕاست و هێزی سیاسی هۆكار گه‌لێكی گه‌وره‌یه بۆ هه‌میشه به‌رده‌وامی ئه‌و هۆكاره خراپانه‌ی دژ به‌مرۆڤایه‌تی، كه سه‌دان هه‌زار ژن و منداڵ به‌رۆژی رووناك كۆمه‌ڵكوژ ده‌كرێن و چه‌ندین گروپی توندڕه‌وی ئیسلامی و چه‌ندین هێزی به‌ناو عیلمانی به‌ڵام رووپۆشكراو له قوڵكردنه‌وه‌ی ململانێی ناوخۆی دامه‌زراون گه‌شه ده‌كه‌ن و بێ گه‌ڕانه‌وه به‌سود گه‌یه‌ندن به‌مرۆڤایه‌تی و خه‌ڵكی هیلاك و ماندووی ناوچه‌كه، كه كوردستانیش به‌هه‌ر چوار پارچه‌كه‌یه‌وه قوربانیه‌كی هه‌ره گه‌وره‌ی ئه‌م به‌زمه‌یه، كه‌به‌داخه‌وه ته‌وژمی خێڵه‌كی و ئاینی و شه‌ڕو گیرۆده‌بوون له‌نێوان هێزه توندڕه‌و دراوسێ چاوچنۆكه‌كانی هه‌میشه گه‌وره‌ترین زیانی به‌ركه‌وتووه‌و ئێستاش له‌به‌رده‌م هه‌ڕه‌شه‌ی زۆر گه‌وره دایه.
