بۆئەوەی شوێنێ خۆمان لە ناو جەنگەکەدا بدۆزینەوە، دەبێت لە تێگەیشتنی سیاسیماندا جیۆگرافیای سیاسی و جیۆگرافیای ستراتیژیی لە یەکتر جیا بکەینەوە.
جیۆپۆلەتیک لە تێگەیشتنی سیاسیی ئێمەدا هەرچەندە تازەیە، بەڵام لە بۆچوونە سیاسیەکانماندا گاریکەریی هەیە، بەڵام تێگەیشتنی سیاسیمان بۆ جیۆستراتیژ تا حەدی ناحاڵی بوون بە سیاسەتمانەوە دیارە.
دەرککردنی جیۆپۆلەتیکی لە کردە سیاسیەکاندا بە مانای خۆدیاریکردن لە مەڵبەندێکدا کە دەوڵەت و نیشتمانە، وەکو گەل، بەرژەوەندییەکانی دەپارێزین، بەڵام دەرککردنی جیۆستراتیژیی هەموو ئەو بەرژەوەندییە سەربازیی - ئابوریانەیە کە لە دەرەوەی نیشتمان - دەوڵەتەوە هۆکارن بۆ مانەوەمان.
زلهێزەکانی وەک ئەمریکا و هاوپەیمانەکانی لە ناتۆدا، لە بەرانبەر ڕوسیا و هاوپەیمانەکانی لە چین و ئێراندا لە جیۆستراتیژیی جیهاندا سیاسەتەکانیان ئاڕاستە دەکەن وخەریکی ئیدارەدانی ناکۆکی و جەنگەکانن.
ئەوەی مایەی سەرسوڕمانە هەمان ئەو هێڵی بەریەککەوتنەی تاکتۆنیکی روسی و ئەمریکی هێڵی گەرمی جەنگی جیهانی یەکەمیش بوو
دیدی جیۆستراتیژیی هەریەکێکیان ئەوەیە زۆرترین دەستەڵاتی بەسەر ڕووبەری دەریا و گەروەکاندا هەبێت، هێڵی نێوانیان لە دەریای بەلتیکەوە لەباکووری زەمینەوە خواردەبێتەوە بۆ باشوور بەرەو کەنداوی فارسی و دەریای عەرەبی، لە نێوان ئەو دوو تاکتۆنیکەدا بە درێژایی ئەو سنوورەی نێوانیان شەڕ و جەنگ بەرپابووە، ئێمەش وەک کورد کەوتووینەتە سەر گەرمترین هێڵی بەرکەوتنیان.
بەسەر ئەو هێڵەوە جەنگەکانی شیعە و سوننە، کورد و تورکیا، ئێران و سعودیە، داعش و ئیسلامییە توندڕەوەکان، کاسۆلیک و ئەرسۆدۆکسەکانی ئۆکرانیا، دابڕانی شێوە دورگەی قرم ..هتد لە جەنگێکی نەبڕاوەدان.
بەسەر ئەو هێڵەوە شیعە و سوننە، کورد و تورکیا، ئێران و سعودیە، داعش و ئیسلامییە توندڕەوەکان، کاسۆلیک و ئەرسۆدۆکسەکانی ئۆکرانیا لە جەنگێکی نەبڕاوەدان
لە چەقی ئەو جیۆستراتیژە ئاڵۆزو پڕ لە گێژاوەی جەمسەرەکاندا ئێمە ( کورد) نەتوانین تێگەشتنی سیاسی خۆمان دروست بکەین، بە هەمان دەستبەتاڵی جەنگی جیهانی یەکەم مایەپوچ و دۆڕاوی مێژوو دێینەوە دەرەوە.