هه‌ڵهاتنی سه‌رۆك وه‌زیران

دواى عه‌بدولمه‌هدیى.. ناسەقامگیریی و ئایندەی عێراق

شاخه‌وان برایم عه‌بدوڵا 2019.12.01 03:58 PM
65 جار خوێندراوەتەوە

شاخه‌وان برایم عه‌بدوڵا

نوسه‌ر و رۆژنامه‌نووس

هەر کە دیقەت لە دۆخی ئەمنی و سیاسیی عێراق دەدەین، ئیدی بەهای ئەو سەقامگیرییەی کوردستان دەردەکەوێت تا ئاستی ئەوەی هەرێمی کوردستان وێڕای قەیران و کۆسپەکانی پێشی، کەچی لەپێش عێراقدایە و ئەوەی ئومێدەوار بوو تا بچینەوە ژێرباڵی بەغدا، پێویستە لە ئێستادا تێگەیشتنەکانی ئەبدێت بکاتەوە.

دەی عێراق پارەی هەیە و مووچەش دەدات و زۆر کەسیش ئەزموونی عێراق بۆ شکاندنەوەی هەولێر بە سەرکەوتوو دەزانن، بەڵام سندان لەو وڵاتە بدات کە هەر رۆژەی دەردێکی نوێ هەناسەی تەنگ دەکات و کۆی ئەزموون و پلانەکانی لەگەڵ گۆڕانکاری لە سەرۆکێکدا، ئەوانیش کۆتاییان دێت تا ئاستی کوشتار و زیاتر بێ بەهابوونی خوێنی مرۆڤەکانی، ئاخر ئەوەی لە عێراقی ئێستادا دەگوزەرێت، ئیدارەدانی قەیرانەکانە بە قەیرانی دیکە و بۆ لەخشتەبردنی مرۆڤی عێراقییە، ئەوەی داخە ڕێگەی جیابوونەوەی کورد لەو دۆزەخەی بەغدا نادەن.

دروستە عێراق زوو زوو سەرۆکی حکوومەت دەگۆڕێت و ئاڵوگۆڕ لە پۆستەکان دەکرێت، بە پێچەوانەی وڵاتان، ئەمەی عێراق ئەوەندەی لە پەتا و ڤایرۆس دەچێت، ئاڵوگۆڕە سرووشتییەکەی دەسەڵات نییە و بگرە ڕۆژ دوای ڕۆژ خراپتریش دەبێت، ئیدی ئەوە عێراقە، هەر لە بنەڕەتدا بە خراپی بادلۆکەی دانراوە، بۆی هەیە دەیانجار بڕووخێت و چاک بکرێتەوە، بەڵام زەحمەتە بەو ئاسانییە سەقامگیریی سیاسی و کۆمەڵایەتی بەخۆیەوە ببینێت، لەکاتێکدا سەقامگیریی ڕۆحی هەر پێشکەوتنێکە لە دەوڵەتدا کە حکوومەت لە ئەنجام و سایەی سەقامگیریی دەتوانێت خزمەت بکات، ئەگەر دەوڵەت سەقامگیر نەبێت، پارە و نەوت و زێڕی دونیاشی هەبێت، خەڵکەکەی ئاسوودە و خۆشگوزەران نابن، ڕێک عێراق لەوەدا وایە، ڕاستە یەکەمی نەوت نییە، بەڵام نەوتی زۆرە و پارەی باشی دێتە خەزێنەوە، کەچی میللەتەکەی ئاسوودە نین و ڕۆژ دوای ڕۆژیش چەقۆی ناعەدالەتی تێیدا تیژتر دەبێت و برینی قووڵتر لە جەستە و ڕۆحی عێراقییەکان دروست دەکات، کە سەرئەنجام ئەوانە ناسەقامگیریی دروست دەکەن. 

عادل عه‌بدولمه‌هدیى سه‌رۆك وه‌زیرانى له‌كارلادراوی عێراق

هەڵبەت ناسەقامگیرییش کاریکەری لەسەر کۆی سێکتەرە خزمەتگوزارییەکان دادەنێت و دەلاقەی گەورەتر لە متمانەی نێوان میللەت و دەوڵەت دروست دەکات، ئەوەی دیقەت دەدرێت عێراقێک کە ئەمەریکا دەیگوت دەیکەینە ئەزموونێکی دیموکراسی لەناوچەکەدا، ئێستا لەپێشچاوی ئەمەریکاوە مەرجەعیەت باڵادەستە و خوێنی عێراقییەکان دڕژێت و کەس ناڵێت ئەی کوا شکۆی مرۆڤبوونی عێراقییەکان.

عێراقییەکان عەبدولمەهدی دەگۆڕن، دروستتر ناچار بە هەڵاتنیان کرد، ئاخر هیچ کەس لە عێراق حەزناکات پۆستەکەی جێبهێڵێت، عەدولمەهدیش وایە، سرووشتی عێراق و پێکهاتە سیاسی و کۆمەڵایەتییەکەی بەجۆرێکە نایەوێ سەقامگیر بێت و هەر خۆیان ئامادەن کێشە بۆ خۆیان دروست بکەن، دواییش گلەیی دەکەن، بۆ نموونە ئێستا سەدر پشکی شێری بەردەکەوێت لە هۆکاری ئاڵۆزییەکان، کەچی هەر ئەو خەڵکەیە پشتی سەدر و دارودەستەکەی دەگرن و ئاڵۆزیی دروست دەکەن، لەگەڵ ئەوەی هەمووان دەڵێن ئێمە لە پێناو میللەت و بژێوی خەڵک و دژی گەندەڵی و نادادی شەقام دەجوڵێنین، کەچی خۆیان هۆکاری ئاڵۆزی و نادادی و رژانی خوێنی خەڵکن.

موقته‌دا سه‌در شه‌پۆلی خۆپیشاندانه‌كان بووه‌ و خه‌ریكه‌ له‌ ئاوی لێڵدا راو ده‌كات


ناسەقامگیریی تێکەڵ بە ڕۆحی عێراقییە مەزهەبییەکان بووە و بەو ئاسانییەش وشک ناکات، ئەو نەختە ئومێدەی لەگەڵ هاتنی عەبدولمەهدیش هەبوو، هەرزوو دەرکەوت سەرابە و بە ڕۆیشتنیشی، نەک کۆتایی نایەت، بەڵکوو زیاتریش دەبێت، ئاخر عەبدولمەهدییەکی بێدەسەڵات هاتە سەر خوانێکی پڕ لە خواردن و کەلوپەلی خراپ و ئەویش هەردەم چاوی لەوە بوو بیانوێک بدۆزێتەوە بۆ جێهێشتنی پۆستەکەی، لەبەر ئەوەی دەیزانی ناتوانێت ئیارەیەکی باشی دۆخەکە بکات، هەر بۆیە پۆستەکەی جێهێشت دروستتر هەڵات.

کاتێک سەیری دۆخی شڵەقاو و تەنگەژاویی عێراقیش دەکرێت، ئینجا پێویستە سەقامکیریی کوردستان بەراورد بکرێت و ڕێز لە سەقامگیرییەکەی بگیرێت تا ئاستی یەکهەڵوێستی لایەنەکان بۆ رووبەڕووبوونەوەی هەر ئەگەرێکی خراپ لە بەغداوە دژی کوردستان، بەوەی تێکچوونی دۆخی عێراق، کاریگەری لەسەر هەولێریش دەبێت.


دوایین بابەت

زۆرترین خوێندراو

  • ڕۆژ
  • هەفتە
  • مانگ